اسعداباد (پژواک، ۱۳ چنګاښ ۱۴۰۰): د کونړ ولايت د وټه پور ولسوالۍ یو اوسېدونکی غلام اکبر چې درې زامن يې د ملي پوځ په لیکو کې وژل شوي وايي، چمتو دی چې د سولې لپاره خپل سر هم قرباني کړي.
۶۵ کلن غلام اکبر چې له روسانو سره په جهاد کې ټپي شوی هم دی، د وټه پور ولسوالۍ د کورباغ سیمې اوسېدونکی دی او اوس د وسله والو د ګواښونو له امله مرکز اسعداباد ته راکډه شوی او د ژوند سختې ورځې شپې تېروي.
کابل (پژواک، ۱۶ غبرګولی ۱۴۰۰): ليکوال او ژورنالېست عصمت قانع چې د امنيتي ګواښونو له امله دا مهال له هېواده بهر ژوند کوي، وايي چې له روحي عذاب سره مخ دى، خو که سوله وشي، ژر به بېرته خپل هېواد ته ستون شي.
د افغانستان په اړه د سولې بین الافغاني خبرې د ۱۳۹۹ کال په وږي میاشت کې په دوحه کې پیل شوې، خو تر اوسه يې هېڅ پرمختګ نه دى کړى او برعکس په هېواد کې د نا امنۍ کچه د پخوا په پرتله څو برابره لوړه شوې چې له امله ګڼ شمېر کسان هېواد پرېښودو ته اړ شوي.
عصمت قانع هم يو له همدغو کسانو دى چې دا مهال په هندوستان کې د مسافرۍ شپې او ورځې تېروي.
کابل (پژواک، ۲۵ غبرګولی ۱۴۰۰): ټول افغانان سوله غواړي، خو عام وګړي، سیاستوال، طالبان او حکومت له سولې بېلابېل تعریفونه لري؛ داسې تعریفونه چې ګډې وجهې لکه «ارام، امن او سوکاله ژوند او په هېواد کې د جګړې پای ته رسېدل.» لری. د افغانستان خلک شاوخوا څلور لسیزې په ناامنۍ، جګړې او له امله یې په رامنځته شوو ستونزو لکه د خپلوانو له لاسه ورکول، په کډوالۍ، بېوزلۍ او اقتصادي ستونزو کې ژوند کړی دی، له دې امله د دغه هېواد اوسېدونکي جګړې خپلي، د جګړې او د جګړې له زیان اړوونکو پایلو تر پزې راغلي، په هېواد کې د سولې او ارامۍ غوښتنه کوي، خو د ټولنې بېلابېلې طبقې له سولې مختلف تعریفونه لري.
شبرغان (پژواک، ۱۷ غبرګولی ۱۴۰۰): ۴۰ کلنه زهره چې د بیک ګنډلو له لارې د خپلې اته کسیزې کورنۍ لپاره نفقه برابروي، د جګړې له ښکېلو لورو غواړي چې سوله وکړي، څو دوی وکولای شي په سوله ییزه فضا کې په ارامۍ کار وکړي. زهره د شبرغان ښار اوسېدونکې او له دوو کلونو راهیسې پر بیک ګنډلو بوخته ده. نوموړې وايي چې تر څلورم ټولګي یې زده کړې کړې خو د جګړې او ناامنۍ له امله د زده کړو له دوام محرومه شوې؛ ځکه هغه مهال ایران ته ولاړل او هلته یې ونه شو کولای زده کړو ته دوام ورکړي.
مزارشريف (پژواک، ۱۰ غبرګولی ۱۴۰۰): په بلخ ولايت کې د جګړو او نا امنيو له امله بېځايه شوی ۶۵ کلن ګل نور وايي چې د جګړو له امله يې ٥٠ جريبه کرنيزه ځمکه شاړه شوې ده، که سوله وشوه، بېرته سیمې ته ور ګرځي او خپلې ځمکې ابادوي. هغه د مزارشريف ښار په ۶۰ کيلومترۍ کې د پرتې ولسوالۍ، شولګرې اصلي اوسېدونکی دی؛ خو اوسمهال
د مزارشريف سوېل لوېديځ لور ته د يونټ په نوم د کډوالو او بېځايه شوو يوه پنډغالي کې اوسېږي.
کابل (پژواک، ۹ غبرګولی ۱۴۰۰ ): يو شمېر خلک پر دې باور دي چې د افغانستان اتباعو ترمنځ تبعيض او بیا يو شمېر خاصو کسانو ته امتياز ورکولو ستونزې پيدا کړې او د سولې راتلو مخه يې نيولې ده.
د افغانستان اساسي قانون په ۲۲مه ماده کې راغلي چې د افغانستان د اتباعو ترمنځ هر راز تبعيض او امتیاز منعه دی او د افغانستان اتباع ښځې او نارینه د قانون پر وړاندې مساوي حقوق او وجایب لري.
پژواک د اساسي قانون د يادې مادې پلې کېدو او يا هم نه پلي کېدو په اړه له يو شمېر کسانو سره خبرې کړې او د هغوی نظر يې را اخيستى دى.
کابل (پژواک، ۲۴ وری ۱۴۰۰): یو متقاعد جنرال، په افغانستان کې د لومړني ولسمشر محمد داوود خان د وژلو پېښې په ګډون د تېرو څلورو لسیزو جګړو زړه بوږنوونکې کیسې کوي، له ښکېلو غاړو غواړي چې یوموټی شي او د افغان وژنې دغه اوږده لړۍ پای ته ورسوي. پنځه اتیا کلن متقاعد جنرال بادشاه میر تڼی د خوست ولایت د تڼیو ولسوالۍ اصلي اوسېدونکی دی او دا مهال په کابل ښار کې ژوند کوي.
کندهار (پژواک، ۱۴ ورى ۱۴۰۰): د کندهار ميرويس حوزوي روغتون د جراحي څانګې ډاکټر چې د جګړې د زرګونو ټپيانو درملنه يې کړې، د سولې په ارمان دی او وايي، نور نه غواړي هېوادوال يې د سترګو پر وړاندې ساه ورکړي او يا له روغتون څخه معيوب رخصت شي.
دغه ډاکټر قدرت الله حکيمي نومېږي چې له تېرو ۱۵ کلونو راهيسې د ميرويس حوزوي روغتون په جراحي څانګه کې د ټرېنر متخصص په توګه کار کوي.
نوموړي په دې موده کې د جګړې د زرګونو ټپيانو ژوند ژرغولی او لا هم خپل دغه انساني چوپړ ته دوام ورکوي.
فيروزکوه (پژواک،٢۹مرغومی ٩٩): د «فري سټایل» څانګې لوبغاړی عبدالرقیب فاروقي چې په ولایتونو کې یې د ورزش له لارې ډېری ځوانان سولې او ورورولۍ ته رابللي وايي، یوازې په سوله ییزه فضا کې کولای شي په ملي او نړیواله کچه وځلېږي.
په دې ورځو کې په ټولنیزو پاڼو کې د یوه ځوان انځورونه لاس په لاس کېږي چې د هریرود سیند په يخکونو کې د سانتي ګراد په ۲۲ درجه سړه هوا کې ورزش کوي.
دغه ځوان ورزشکار عبدالرقیب فاروقي نومېږي چې له تېرو اووه کلونو راهیسې د «فري سټایل» په برخه کې تمرین کوي.
مزارشريف ( پژواک، ۲۲ مرغومی، ۹۹) د بلخ ولايت په مرکز مزارشريف ښار کې د يوه رسټورانټ مالکه مېرمن تمه لري چې د سولې په راتلو سره به يې کاروبار وده وکړي او وبه غوړېږي. زهرا ابراهيمي په اداره او عامه پاليسۍڅانګه کې لوړې زده کړې کړي او له څه باندې يو کال راهيسې يې د مزارښار درېيمې ناحيې په مربوطاتو کې د (يونېک) په نوم رستورانټ جوړ کړی دی. خو نوموړې وايي چې وروستيو جګړو، نا امنيو او په ښار کې د جنايي جرمونو زياتوالي ان د دې د رستورانټ پر چارو منفي اغېزه کړې ده. هغه هيله لري چې د بين الافغاني خبرو دويم پړاو کې به پر سولې توافق وشي چې ورسره به د دې کاروبار هم وده وکړي.